2025-yil yanvar–oktyabr oylarida O‘zbekistonning tashqi savdo aylanmasi 66,5 milliard dollarga yetib, o‘tgan yilning shu davriga nisbatan 21,5 foizga oshdi. Eksport hajmi 29 milliard dollargacha, import esa 37,5 milliard dollargacha ko‘tarildi va tashqi savdo taqchilligi qisqardi. Oziq-ovqat mahsulotlari eksporti 40 foizga o‘sdi, bunda meva-sabzavot va don mahsulotlarining ulushi katta bo‘ldi. Kimyo mahsulotlari eksporti 21 foizga, tayyor mahsulotlar eksporti esa 54 foizga oshdi; kiyim-kechak yetkazib berish 16 foizga ko‘paydi. Energetika sektori 10 foizga kengaydi, xizmatlar eksporti esa turizm, transport va IT hisobiga 33 foizga oshdi. Shu bilan birga, to‘qimachilik va mato, rangli metallar, avtomobillar hamda mashinasozlik mahsulotlari eksporti kamaydi. Oktabr oyida oltin eksporti deyarli to‘xtagan bo‘lsa-da, o‘n oy yakunida uning hajmi qariyb 10 milliard dollarga yetib, tarixiy rekordni yangiladi.

Import bo‘yicha mashinasozlik mahsulotlari yetakchi o‘rinda qolmoqda, uskunalar va ehtiyot qismlar xaridi ortdi. Go‘sht, avtomobil ehtiyot qismlari, cho‘yan va po‘lat, shuningdek, tibbiy mahsulotlar importida keskin o‘sish kuzatildi. Sanoat mahsulotlari va kimyo bo‘yicha ham barqaror o‘sish qayd etildi. Shu bilan birga, avtomobillar hamda yoqilg‘i-energetika mahsulotlari importi kamaydi. Savdo aylanmasida Xitoy 13,1 milliard dollar bilan yetakchilik qilmoqda, undan keyin Rossiya 10,6 milliard dollarlik ko‘rsatkich bilan ikkinchi o‘rinda turadi. Qozog‘iston, Turkiya va Janubiy Koreya ham O‘zbekistonning asosiy hamkorlari qatorida.

Toshkent viloyatining Yangiyo‘l tumanida Silkway Central Asia nomli yirik logistika markazi qurilishi boshlandi. Umumiy maydoni 159,4 gektar bo‘lgan loyiha qiymati taxminan 300 million dollarga teng. Markazda 172 000 m² konteyner maydonlari, 167 000 m² A va B sinfidagi omborlar, 18 700 m² savdo-ko‘rgazma markazi hamda 28,4 km yangi temir yo‘l infratuzilmasi barpo etiladi. Qurilishning birinchi bosqichi 2027-yil boshida yakunlanishi rejalashtirilgan. Yangi markaz O‘zbekistonning Markaziy Osiyodagi transport-logistika uzel sifatidagi mavqeini yanada mustahkamlaydi.

Xitoy Xalq Banki (PBoC) o‘zining raqamli yuan (e-CNY) asosidagi xalqaro to‘lov tizimini 10 ta ASEAN davlati va 6 ta Yaqin Sharq mamlakati bilan integratsiya qilishni yakunlaganini e’lon qildi.

Endi jahondagi savdoning 38 foizgacha bo‘lgan qismi SWIFT tizimidan chetlab o‘tgan holda, e-CNY orqali bevosita amalga oshirilishi mumkin — tranzaksiya vaqti esa 3–5 kundan atigi 7 soniyagacha qisqargan.

Bu global moliyaviy tizimni o‘zgartirish yo‘lidagi muhim qadam — dollarga kamroq bog‘liqlik, tezlik va samaradorlik esa yanada yuqori darajada.

O‘zbekiston hukumati transport-logistika markazlari (TLM) va tranzit koridorlarini rivojlantirish bo‘yicha yangi tartibni tasdiqladi.

2025-yil 1-dekabrga qadar barcha talabga javob beruvchi markazlar bo‘yicha to‘liq inventarizatsiya o‘tkazilib, ular maxsus reyestrga kiritiladi.

Xalqaro logistika markazlari uchun minimal maydon 4 gektar, mintaqaviy markazlar uchun esa 3 gektar etib belgilangan.

Shuningdek, infratuzilma va jihozlash bo‘yicha yangi standartlar joriy etildi.

Maqsad — logistika samaradorligini oshirish va O‘zbekiston logistika markazlarini BMT ESCAP quruqlik portlari ro‘yxatiga kiritish, bu esa mamlakatning Yevrosiyo transport tarmog‘idagi strategik o‘rnini mustahkamlaydi.

Transport vaziri Ilhom Maxkamov mamlakat Turkmaniston va Ozarbayjondan kema xarid qilish imkoniyatini ko‘rib chiqayotganini ma’lum qildi.

Sababi oddiy: Kaspiy orqali yuk tashish hajmi ortib bormoqda, natijada navbatlar 30–40 kungacha cho‘zilmoqda. O‘z flotiga ega bo‘lish yuklarni tezroq qayta yuklash va tashqi operatorlarga qaramlikni kamaytirishga yordam beradi.

«Biz bu korxonalardan kema xarid qilish imkoniyatini o‘rganib chiqishga kelishdik», — dedi vazir.

Avvalroq O‘zbekiston Transport vazirligi va Turkmanistonning Dengiz va daryo transporti davlat xizmati kema qurish sohasida hamkorlik bo‘yicha memorandum imzolagan edi.